Трамп АҚШ ва Венесуэла ўртасида «тарихдаги энг йирик» нефть битими тузилганини эълон қилди

АҚШ президенти Дональд Трамп Қўшма Штатлар ва Венесуэла ўртасида нефть соҳасида «тарихдаги энг йирик келишув» тузилганини эълон қилди.

У бу ҳақда Truth Social ижтимоий тармоғидаги саҳифасида маълум қилди.

Трампнинг сўзларига кўра, келишув доирасида АҚШ Венесуэланинг тасдиқланган нефть захираларининг қарийб 20 фоизи — 65 млрд баррелдан ортиқ қисми устидан назоратга эга бўлади. АҚШ раҳбари бунинг учун америкалик солиқ тўловчилардан «ҳеч қандай харажат талаб этилмаслиги»ни таъкидлади.

Трампнинг таъкидлашича, битим АҚШнинг нефть ресурсларини икки баравардан кўпроқ ошириш, етказиб бериш ҳажмини кенгайтириш ва узоқ муддатли истиқболда америкаликлар учун бензин нархларини сезиларли пасайтириш имконини беради.

АҚШ президенти келишувга эришиш жараёнида давлат котиби Марко Рубио, мудофаа вазири Пит Ҳегсет ва Венесуэланинг муваққат президенти Делси Родригес иштирок этганини маълум қилди.

Шунингдек, Трамп ушбу битим Венесуэланинг «муваффақият ва фаровонлик» сари ҳаракат қилишига ёрдам беришига ишонч билдирди.