Трамп: "АҚШ тез орада Эрон бўйича қарор қабул қилади"

Қўшма Штатлар Эрон бўйича тез орада қарор қабул қилишни режалаштирмоқда, деди Америка етакчиси Дональд Трамп журналистларга.

"Тез орада Эрон бўйича қарор қабул қиламиз", деди Трамп.

Аввалроқ Axios портали Вашингтон ва Теҳрон ўртасидаги музокараларнинг иккинчи раунди 19 апрель куни Римда бўлиб ўтиши мумкинлигини хабар қилганди. Нашрнинг таъкидлашича, жойлашувни ўзгартириш АҚШ томонидан таклиф қилинган.

13 апрель куни The Wall Street Journal газетаси агар Қўшма Штатлар бир қатор талабларни бажарса, Эрон 2015 йилги ядровий келишувда кўрсатилган шартларга қайтиши мумкинлиги ҳақида хабар берди.

Эслатиб ўтамиз, 12 апрель куни Маскатда АҚШ президенти Дональд Трампнинг Яқин Шарқ бўйича махсус вакили Стив Уиткофф ва Эрон ташқи ишлар вазири Аббос Арағчи ўртасида учрашув бўлиб ўтган эди. Оқ уй музокаралар конструктив ўтганини айтди.