Россия президенти Владимир Путин Украинадаги ҳозирги фронт чизиғида ҳарбий ҳаракатларни тўхтатишни таклиф қилди. Бу ҳақда Financial Times газетаси учта ишончли манбага асосланиб хабар берди.
Газета манбаларининг айтишича, ўтган ҳафта Путин АҚШ президентининг махсус вакили Стив Виткоффга Россия Украинанинг тўрт вилоятининг босиб олинмаган ҳудудларига бўлган "даъволаридан" воз кечиши мумкинлигини маълум қилган.
"Ушбу таклиф Путиннинг уч йил олдин уруш бошланганидан бери берган биринчи расмий ишораси бўлиб, Россия босқинни тўхтатиш бўйича талабларидан чекиниши мумкинлигини кўрсатмоқда," дея таъкидлайди нашр.
Шу билан бирга, Financial Times билан суҳбатлашган Европа амалдорлари Путин АҚШга нисбатан аниқ ён беришдан фойдаланиб, Трампни Россиянинг бошқа талабларини қабул қилишга ва уларни Украинага мажбурлашга - масалан, Қрим қўшиб олинишини тан олиш ва НАТОга аъзо бўлишни тақиқлашга ундаши мумкинлигидан хавотирда эканликларини билдирмоқда.
"Ҳозирда Киевга катта босим ўтказилмоқда. Бу босимнинг мақсади Киевни ён беришга мажбурлаш ва Трампга ғалаба қозонганини эълон қилиш имкониятини яратишдир," - деди FT суҳбатдошларидан бири.
ОАВ аввалроқ хабар берганидек, АҚШ 23 апрель куни Лондонда бўлиб ўтадиган музокараларда Россия-Украина урушида ўт очишни тўхтатиш бўйича қадамларни муҳокама қилиш жараёнида ўз таклифини тақдим этади. Бу таклиф доирасида Вашингтон томонидан Қримни Россияга тегишли деб тан олиниши ва тинчлик келишуви доирасида фронт чизиғини музлатиш масалалари кўриб чиқилади.
Украина раҳбари Владимир Зеленский Киевга бундай таклифлар расман келмаганини таъкидлади.
Шу билан бирга, АҚШ президенти Доналд Трамп бир кун олдин эълон қилишича, шу ҳафта у Украинадаги уруш бўйича ўзи таклиф этган "тинчлик режаси"нинг мазмунини ошкор қилади.
Техас кўлида 2 метрлик маҳлуқ қўлга тушди, бу жаҳон рекорди бўлиши мумкин
Гидрометеорология хизмати агентлиги тезкор ахборот берди
"Реал"ни вақтинча ким бошқариши мумкинлиги маълум бўлди
