Тошкентдаги мактабда фонд учун 100 минг сўмдан пул йиғилаётгани айтилди

Ижтимоий тармоқ саҳифаларида М.Улуғбек туманидаги 50-сонли мактабда ҳар ой фонд учун 100 минг сўмдан пул йиғилаётганидан шикоят қилинган эди.

Мазкур ҳолат юзасидан Тошкент шаҳар мактабгача ва мактаб таълими бошқармаси қуйидагиларни маълум қилади. Пойтахтимиздаги барча давлат умумтаълим мактабларида дарслар тўлиқ бепул ўтилади. Фақатгина ҳар бир таълим муассасасида буджетдан ташқари маблағ топиш мақсадида ўқувчиларга дарсдан кейин Ўзбекистон Республикаси Вазирлар Маҳкамасининг 2019 йил 22 апрелдаги «Халқ таълими вазирлиги тизимидаги умумий ўрта таълим муассасаларида пуллик таълим хизматларини кўрсатиш тартиби тўғрисида»ги 343-сонли Низомига биноан шартнома асосида пуллик қўшимча тўгараклар ҳамда машғулотлар ўтиш, куни узайтирилган гуруҳлар фаолиятлари йўлга қўйилган.

Жумладан, Мирзо Улуғбек туманидаги 50-сонли ихтисослаштирилган давлат умумтаълим мактабида ҳам айни пайтда юқоридаги Қарор асосида бир қатор ишлар амалга оширилмоқда. Мактабда анъанавий дарслар бепул олиб борилади. Ота-оналарнинг истак-хоҳишларига кўра, таълим масканида мактаб билан тузилган ўзаро шартнома асосида қўшимча дарслар, тўгараклар, куни узайтирилган гуруҳлар ташкил этилганлигини билдирамиз.

Мактаб маъмурияти томонидан 2024/2025-ўқув йили бошида синф раҳбарлари, ўқитувчилар, ота-оналар иштирокида йиғилиш ўтказилиб, турли байрам, мактаб таъмири ва фонди учун ноқонуний пул йиғимларини амалга ошириш таъқиқланиши бўйича огоҳлантирилган,- дейилади хабарда.