Тошкентда вилоятликларни ҳақорат қилган қиз қамоқ жазосини ўтаб чиқди

Вилоятликларни тилга олиб бўлмас сўзлар билан ҳақорат қилиб, шу қилмиши учун 15 суткага қамалган 21 ёшли қиз суд томонидан белгиланган маъмурий қамоқ жазосини тўлиқ ўтаб чиқди. Бу ҳақда Тошкент шаҳар суди матбуот хизматига таяниб, “Дарё” маълум қилди.

Ҳақорат ва қамоқ

Ижтимоий тармоқларда 21 ёшли қиз вилоятликларни ҳақоратлагани акс этган видео тарқалиб, турли муҳокамаларга сабаб бўлган эди.

Мазкур видео тарқалгач, қиз Ички ишлар бўлимига олиб келинган ва унга нисбатан 3 июнь куни суд мажлиси ўтказилган. Суд ҳукмига кўра, қиз Маъмурий жавобгарлик тўғрисидаги кодекснинг 183-моддасида назарда тутилган маъмурий ҳуқуқбузарликни содир қилган деб топилган ва унга 15 сутка маъмурий қамоқ жазоси тайинланган. Шунингдек, ундан қамоққа олинган шахсларни махсус қабулхонада сақлаш билан боғлиқ бўлган харажатлар учун 765 минг сўм ундириш белгиланган.

Қиз суд қарори устидан апелляция бермаган. У туғилган кунини қамоқда ўтказган.

У қилган иши учун барчадан кечирим сўраб, бошқа ҳақоратламаслигини билдирган.

Танишим билан айлангани чиққан эдик. Одам жуда кўп бўлгани сабабли кайфиятимиз бузилди. Тирбандликлар кўплиги туфайли жаҳлим чиқиб, жаҳл устида гапирдим. Ортиқча гапириб қўйдим. Танишим телефон қилиб, видеом тармоқларда тарқалаётганини айтди. Кейин жонли эфир қилдим. Жонли эфирда ҳам ҳамма негатив ёза бошлади. Узр сўрамадим. Негатив ёзишгани учун жаҳлим чиқиб, яна ҳақоратли гаплар гапириб қўйдим. Бошқа ундай қилмайман. Вилоятликларни ажратиб, унақа маънода гапирмаганман. Одам кўплиги учун жаҳл устида ҳақоратли сўзлар билан гапирганман. Ҳаммадан кечирим сўрайман, — деган эди қиз.

Қизнинг отаси фарзандининг қилмиши ёшликдаги хатолик эканини айтиб, қизининг аксарият танишлари ҳам вилоятликлар эканини, қолаверса, ўзи ва аёли ҳам вилоятдан эканини айтган.