Тошкентда уйда гиёҳванд ўсимлигини етиштирган шахслар қўлга олинди

Тошкент шаҳрининг Миробод туманида уй шароитида гиёҳвандлик ўсимликлари етиштираётган шахслар ушланди. Бу ҳақда ИИББ хабар берди.

Қайд қилинишича, жиноят қидирув бўлими ходимлари томонидан олинган тезкор маълумот асосида уйлардан бирида тинтув ўтказилган. У ерда бўйи 60 дан 170 сантиметргача бўлган гиёҳвандлик ўсимлиги иссиқхона услубида, тувакда, махсус ёруғлик ва ҳаво алмашинуви воситалари ёрдамида етиштирилаётгани аниқланган.

Таъкидланишича, 12 туп гиёҳвандлик ўсимлиги, шунингдек, қуритилиб, истеъмолга тайёрлаб қўйилган хомашё далилий ашё сифатида олиб қўйилган.

Хабарга кўра, худди шу ҳудудда яна бир турар жой биноси кўздан кечирилганда, унинг эгаси ҳам гиёҳвандлик ўсимликларини етиштираётгани маълум бўлган. Ҳуқуқ-тартибот ходимларини кўргач, у ўсимликни сувга оқизиб, йўқ қилишга уринган, аммо ниятига етолмаган.

Жиноят кодексининг 270-моддасига кўра, тақиқланган экинларни етиштириш 10 йилгача озодликдан маҳрум қилиш билан жазоланади. Бундан ташқари, 273-моддада гиёҳвандлик воситаларини сотиш мақсадида қонунга хилоф равишда ишлаб чиқариш, олиш, сақлаш ва бошқа ҳаракатлар содир этганлик учун 20 йилгача озодликдан маҳрум қилиш жазоси назарда тутилган.