Тожикистонда Исмоил Сомоний музлигининг катта қисми узилиб тушди

Тожикистоннинг Тожикобод туманидаги Исмоил Сомоний чўққисининг юқори қисмида музликдан катта муз массаси узилиб тушди, деб хабар берди мамлакат Фавқулодда вазиятлар қўмитаси.

Унга кўра, ҳодиса 25 октябрь куни соат тахминан 11:00 да Сафедоби қишлоғи яқинида содир бўлган.

Музликнинг узилган қисми дарага сирғалиб тушган, аммо соат 14:00 га келиб вазият тўлиқ назоратга олинган.

Узилган қисмнинг узунлиги тахминан 2 километр, баландлиги 25 метр ва кенглиги 150-200 метр деб тахмин қилинмоқда.

Дастлабки маълумотларга кўра, қурбонлар ёки жиддий зарар кузатилмаган.

Бироқ, мутахассислар узоқ давом этган ёмғир ёғиши ва музликнинг яна узилиб тушиши Гулрез қишлоғида қишлоқ хўжалигига таҳдид солиши мумкинлиги ҳақида огоҳлантирмоқда.

Маҳаллий ҳокимият ва қутқарув хизматлари вазиятни кузатишда давом этмоқда ва ҳар қандай ўзгаришларга тезда жавоб беришга тайёр.

Исмоил Сомоний музлиги Тожикистоннинг тоғли ҳудудларидаги энг йирик музликлардан биридир.

Мутахассислар музликнинг узилиб тушишини иқлим ўзгариши билан боғламоқда, бу эса минтақада табиий офатлар хавфини оширади. Музликларнинг қисқариши узоқ муддатли жиддий экологик ва иқтисодий оқибатларга олиб келиши ҳақида хабар берилди.

Бу воқеа яна бир бор иқлим ўзгариши ва унинг музликлар ҳамда минтақа экологиясига таъсирига эътибор қаратиш зарурлигини кўрсатди.

Кейинги воқеалар ривожини баҳолаш ва ҳалокатли оқибатларнинг олдини олиш учун зарурий чораларни кўриш бўйича саъй-ҳаракатлар давом этмоқда, деб хабар берди asiaplustj.info.