Тожик-Афғон чегарасида 4 та террорчи йўқ қилинди

Тожикистон чегарасида Афғонистондан ўтган 4 та террорчи йўқ қилинди, деб хабар беади Ховар.

Тожикистон Республикаси Миллий хавфсизлик давлат қўмитасининг Чегара қўшинлари матбуот маркази хабар беришича, 2026 йил 18 январь куни тахминан соат 00:30 да Шамсиддин Шоҳин туманидаги 7-чегара постига террорчилик ташкилотининг 4 та аъзоси давлат чегарасини бузиб, Афғонистоннинг Бадахшон вилояти Дарбандак қишлоғидан Тожикистон ҳудудига ўтган.

Тезкор-қидирув тадбирлари давомида террорчиларнинг жойлашган ўрни аниқланди. Чегарачиларнинг таслим бўлиш талаби бажарилмаган, террорчилар қуролли қаршилик кўрсатган.

Тўқнашув давомида 4 та террорчи зарарсизлантирилди. Ҳодиса жойидан 3 та «Калашников» автомати, 1 та хорижий милтиқ, 6 та ўқдон, 183 дона АК ва тўпонча ўқлари, 3 та мобил телефон, 1 та радиоқабул қилгич ва 1 та қайиқ мусодара қилинди.

Идора мазкур ҳодиса бўйича жиноий иш қўзғатилганини, ҳозирги вақтда давлат чегарасидаги вазият назоратда эканлигини маълум қилди.