Тинчлик режаси Украина ҳамда Россиянинг таклифлари асосида қайта ишланди — АҚШ президенти

Доналд Трамп ўзининг Truth Social тармоғида Россиянинг Украинага қарши урушини тўхтатиш режасига оид айрим тафсилотларни маълум қилди.

Унинг айтишича, ҳужжат икки томоннинг таклифлари инобатга олинган ҳолда қайта ишланган ва ҳозир фақат айрим бандлар бўйича келишмовчиликлар қолган.

"Шу сабабли менинг махсус вакилларим Стив Уиткофф ва Дэн Дрисколл Москва ва Киевга юборилади. Улар маҳаллий расмийлар билан суҳбатлар ўтказиб, эришилган натижалар ҳақида хабар беради", — деди Оқ уй раҳбари.

"Мен президент Зеленский ва президент Путин билан учрашишни интиқлик билан кутяпман, бироқ бу учрашув фақат урушни тўхтатиш бўйича келишув якуний босқичига етганда амалга ошади", — дея қўшимча қилди Трамп.