“Тинчлик оғриқли бўлади, аммо урушдан яхшироқ”

Украина ва АҚШ президентлари ўртасида бугунги учрашув тинчлик йўлидаги муҳим қадам бўлиши мумкин. Бу ҳақда Германиянинг BILD нашри бош муҳаррири Роберт Шнайдер ўз шарҳида маълум қилди.

Унга кўра, агар Дональд Трамп учрашувдан сўнг Путин билан келишув имкониятини кўрса, яқин кунларда Трамп, Путин ва Зеленский иштирокида уч томонлама саммит ўтказилиши мумкин. Бу саммит Украинада тинчлик музокаралари учун асос бўлиб хизмат қилиши эҳтимолдан холи эмас.

Бироқ тинчлик осон бўлмайди. Шнайдерга кўра, барча томонлар оғир қарорлар қабул қилишига тўғри келади:

• Трамп аввалги позициясига зид равишда, АҚШ томонидан Украинага хавфсизлик кафолатлари беришга тайёрлигини билдирган.

• У АҚШ ҳарбийларини юбормоқчи эмас — шу боис тинчликни таъминлаш масъулияти Европага тушиши мумкин. Бу эса Германия ҳарбийларини Украинага юбориш эҳтимолини ҳам англатади.

• Украина эса энг оғир босқичга дуч келади: Путин Донбасс ва бошқа ҳудудларни ўз назоратида сақлашни талаб қилмоқда. Эвазига, у келгусида Украина ёки Европанинг бошқа давлатларига ҳужум қилмасликка ваъда беради. Трамп эса Зеленскийдан бу “ҳудудий алмашинув”га розилик кутади.

Муҳим муаммо — Путинга ишонч йўқ. Лекин тинчликка эришиш учун ундан бошқа суҳбатдош йўқ.

Шнайдер хулоса қилади: “Бу оғриқли тинчлик бўлади. Аммо ягона альтернатива — чўзилган ва янада ҳалокатли уруш.”