Tesla савдо тарифлари туфайли Хитойдан эҳтиёт қисмлар импортини тўхтатади

АҚШ президенти Дональд Трамп маъмурияти томонидан жорий қилинган божлар Американинг Tesla компаниясининг Cybercab робот таксилари ва Semi электр юк машиналари учун бутловчи қисмларни Хитойдан сотиб олиш режаларини барбод қилди. Бу ҳақда Reuters ёзмоқда.

Reuters манбасига таяниб хабар беришича, АҚШ Ҳукумат Самарадорлик Департаменти (DOGE) куратори Илон Маскга тегишли компания Трамп Хитой товарларига 34 фоизлик тарифларни жорий қилганидан кейин қўшимча харажатларни қоплашга тайёр эди, аммо амалдаги 145 фоизлик божлар Teslaни Хитойдан эҳтиёт қисмлар импортини номаълум муддатга кечиктиришга мажбур қилди. Бу компаниянинг 2026 йилга мўлжалланган янги моделларни оммавий ишлаб чиқаришни йўлга қўйишига тўсқинлик қилиши мумкин. Ушбу мақсадга эришиш учун Tesla яқин ойларда керакли компонентларни харид қилишни ва олишни бошлаши керак.