Тел-Авивда Ғазо шаҳри ишғолини тўхтатиш талаб қилинган намойиш бўлиб ўтди

Ўн минглаб исроиллик фаоллар Тель-Авив кўчаларига чиқиб, Бош вазир Беньямин Нетаняху ҳукуматидан Ғазо шаҳрини босиб олиш режасидан воз кечишни, зудлик билан отишмаларни тўхтатиш ва асирлар алмашинуви бўйича келишувга эришишни талаб қилдилар.

Намойишчилар Исроил музейи олдида тўпланиб, майдонни “Гаров майдони” деб аташди. Улар қўлларида АҚШ президенти Дональд Трампка мурожаат қилинган плакатларни кўтариб чиқишди: “Трамп, тарих яратинг!” — деган даъват билан АҚШни Ғазодаги тинчлик жараёни ва асирларни озод қилишда ёрдам беришга чақирдилар.

Намойишда сўзга чиққанлар орасида асирда бўлган Авинатан Орнинг акаси Моше Ор ҳам бор эди. Унинг сўзларига кўра, мамлакатдаги асосий устувор вазифа — “зудлик билан кенг қамровли отишмаларни тўхтатиш ва асирлар алмашинувини амалга оширишдир”.

Фаоллар, шу жумладан машҳур актёр Лиор Ашкенази, кечки соат 18:00 да йиғилиши кутилган вазирлар маҳкамасини кескин танқид қилди. Унинг таъкидлашича, ҳукумат “асирлар масаласини муҳокама қилишдан қочмоқда”. Ашкенази юзлаб намойишчиларни бугун кечқурун Кнессет биноси олдига йиғилишга чақирди.

Шу билан бирга, журналистларнинг қайд этишича, бу галги намойишларда иштирокчилар сони ўтган ҳафта ва аввалги ойларга нисбатан камроқ бўлди. Тель-Авивдан ташқари, Ҳайфа ва Ғарбий Қуддусда ҳам Нетаняху ҳукуматига қарши акциялар ўтди.

Ишғол режаси
8 август куни Исроил Хавфсизлик кенгаши Ғазо шаҳрини босиб олиш режасини маъқуллади. Нетаняху бу қарорни армия режаси сифатида қўллаб-қувватлади. Биринчи босқичда тахминан 1 миллион фаластинлик жанубга кўчирилиши, шундан сўнг шаҳар ўраб олиниши ва кучли ҳужумлардан кейин ишғол қилиниши кутилмоқда.

Исроил 1967 йилдан 2005 йилгача, 38 йил давомида Ғазо секторида ишғолчи куч сифатида қолган. Ҳозир эса 18 йилдан бери қаттиқ блокада остида яшаб келаётган Ғазода 2,3 миллион фаластинлик истиқомат қилади. БМТ ҳисоботларига кўра, ҳозир минтақада очлик ва озиқ-овқат хавфсизлиги бўйича кескин инқироз юзага келган.