Тайсон Фьюри: "Ҳеч қачон рингга қайтмайман"

36 ёшли британиялик Тайсон Фьюри қайтиш эҳтимоли ҳақидаги саволга нуқта қўйди.

Sky Sports нашрига берган интервьюсида "Лўлилар қироли" рингдаги вақти ўтганини айтди.

"Мен рингга қайтаманми? Ҳеч қачон. Ёшим ўтиб қолди. Соқолимга қаранг - ҳаммаси оқариб кетди. Бокс ёшлар учун ўйин", - дейди оғир вазн тоифасида WBC, WBO, IBO, WBA Super, The Ring ва IBF камарларининг собиқ соҳиби.

Январь ойида Фьюри нафақага чиққанини эълон қилди, аммо баҳор ва ёзда у Александр Усик ёки Энтони Жошуа билан жанглар учун қайтиши мумкинлиги ҳақида бир неча бор ишора қилди. Янги баёнот анча қатъийроқ кўринади ва реваншлар ёки чемпионлик жанглари ҳақидаги миш-мишларга чек қўйганга ўхшайди.

Шундай қилиб, Фьюри даври, боксчининг сўзларига кўра, расман тугади ва унинг қайтиши ҳақидаги барча гаплар ҳикоянинг бир қисми бўлиб қолмоқда.