Сурия «Ҳизбуллоҳ» учун мўлжалланган қурол-яроғ партияси ушланганини маълум қилди

Сурия–Ироқ чегарасида нефть ташиётган юк машинасидан ракета ва дронлар топилди.

Сурия ҳукумати Сурия–Ироқ чегарасида Ливандаги «Ҳизбуллоҳ» гуруҳи учун мўлжалланган қурол-яроғни ноқонуний олиб ўтишга уринишнинг олди олинганини маълум қилди.

Сурия Ички ишлар вазирлигига кўра, нефть ташиётган юк машинаси кўздан кечирилганда узоқ масофага мўлжалланган ва танкка қарши ракеталар, шунингдек, учувчисиз учиш аппаратлари аниқланган.

Дамашқнинг таъкидлашича, ушбу қуроллар кейинчалик «Ҳизбуллоҳ» гуруҳига етказиб берилиши режалаштирилган.

«Ҳизбуллоҳ» эса бу айбловларни рад этиб, уларни «ҳеч қандай ҳақиқий асосга эга бўлмаган тўқима ҳикоялар» деб атади.

Ҳодисадан сўнг Ироқ бош вазири Али аз-Зайдий махсус тергов комиссияси тузиш бўйича топшириқ берди. Бағдод, шунингдек, мазкур иш юзасидан Сурия ҳукумати билан ҳамкорликда тергов олиб боришга тайёрлигини билдирди.