Сурия авиабазага берилган зарбадан сўнг Исроил билан алоқаларни тўхтатди

Сурия Идлиб вилоятидаги Абу ал-Дуҳур авиабазасига берилган зарбадан кейин Исроил билан тўғридан-тўғри алоқаларни тўхтатди. Бу ҳақда Сурия ташқи ишлар вазири Асад аш-Шайбоний маълум қилди.

Унинг сўзларига кўра, Дамашқ хавфсизлик соҳасидаги келишув бўйича музокаралар тез орада қайта бошланишига ва охир-оқибат Исроил кучларининг Сурия ҳудудидан олиб чиқилишига умид қилмоқда.

«Ҳозир биз Исроилга ишонмаймиз», — деди вазир. Унинг таъкидлашича, Исроил Сурия томони ушбу объект Туркиянинг ҳарбий базасига айлантирилмаслиги ҳақида кафолат берганига қарамай, Абу ал-Дуҳурга зарба берган.

Шу билан бирга, аш-Шайбоний Сурия Туркия билан ҳарбий тайёргарлик ва мудофаа соҳасидаги ҳамкорликни давом эттиришини таъкидлади.

Унинг сўзларига кўра, сўнгги кескинлашувдан олдин Дамашқ ва Тел-Авив бўлажак хавфсизлик келишувининг деярли барча бандларини ёзма равишда келишиб олган. Вазирнинг айтишича, келишув Исроилнинг ҳужумлари ва Суриянинг ички ишларига аралашувини тўхтатиш, Башар Асад режими қулаганидан кейин босиб олинган Сурия ҳудудларидан Исроил қўшинларини олиб чиқиш ҳамда чегара яқинида бир нечта хавфсизлик зоналарини ташкил этишни назарда тутади.

Аш-Шайбоний, шунингдек, АҚШ томонларни музокара столига қайтариш мақсадида Исроилга босим ўтказаётганини қўшимча қилди.