Сунъий интеллектни тартибга солиш учун алоҳида халқаро тузилма яратиладими?

OpenAI раҳбари сунъий интеллектни тартибга солиш учун алоҳида халқаро тузилма яратишни таклиф қилди.

Сэм Алтман Нью-Деҳлида ўтказилган сунъий интеллект бўйича конференцияда сўзга чиқиб, тез суръатларда ривожланаётган ушбу технологияни “зудлик билан” тартибга солиш зарурлигини таъкидлади.

Алтманнинг огоҳлантиришича, очиқ кириш имкониятига эга сунъий интеллект моделлари янги муаммоларни яратишга ёрдам бериши мумкин бўлган тизимларнинг пайдо бўлишига сабаб бўлaди. Унинг фикрича, жамият бундай хатарлардан ҳимояланиш механизмларини олдиндан ишлаб чиқиши лозим.

"Сунъий интеллектни демократлаштириш инсоният фаровонлигини таъминлашнинг энг мақбул йўлидир. Мазкур технологиянинг битта компания ёки битта давлат қўлида жамланиб қолиши ҳалокатли оқибатларга олиб келиши мумкин", — деди Алтман.

Унинг сўзларига кўра, бошқа кучли технологияларда бўлгани каби, сунъий интеллект учун ҳам аниқ ҳимоя чораларини жорий этиш зарур. Бу жараённи мувофиқлаштириш учун дунёга Халқаро атом энергияси агентлигига ўхшаш тузилма керак бўлиши мумкин.

Шу билан бирга, кўплаб тадқиқотчилар ва фуқаролик жамияти фаоллари нейротармоқлар билан боғлиқ иш ўринларининг қисқариши, жинсий мазмундаги дипфейклар ва онлайн фирибгарлик каби хавфларга қарши янада қатъий чоралар кўриш зарурлигини таъкидламоқда.