Машҳур брендлар қулоқчинларида хавфли кимёвий моддалар аниқланди

"Bose", "Panasonic", "Samsung" ва "Sennheiser" каби машҳур брендлар томонидан ишлаб чиқарилган қулоқчинларда инсон саломатлиги учун хавфли кимёвий моддалар аниқланди. Бу ҳақда хорижий ОАВ хабар бермоқда.

Тадқиқот натижалари шуни кўрсатадики, ушбу моддалар орасида саратон, нейроривожланиш муаммолари ва гормонал бузилишларни келтириб чиқарадиган бисфеноллар, фталатлар, бромли ва органофосфат алангани секинлаштирувчи воситалар, шунингдек, хлорли парафинлар мавжуд. Қайд этилишича, гормонал бузилиш келтириб чиқарувчи кимёвий моддалар эркакларда аёллар гормонлари миқдорини оширади.

Чехия, Словакия, Венгрия, Словения ва Австрияда ўтказилган лаборатория таҳлилларига кўра, текширилган ҳар 81 та қулоқчиннинг 98 фоизида BPA (бисфенол А) ва учдан икки қисмидан кўпроғида BPS аниқланган. Экспертларнинг таъкидлашича, қулоқчинларнинг тери билан узоқ вақт давомида алоқада бўлиши ушбу кимёвий моддаларнинг организмга сўрилишини тезлаштириши мумкин.

Мутахассисларнинг фикрича, кундалик фойдаланишда, айниқса спорт билан шуғулланиш пайтида тер ажралиши ва иссиқлик бу моддаларнинг терига ўтишини кучайтиради. Қулоқчинлар кундалик ва узоқ муддат ишлатиладиган қурилмалар бўлгани учун улар фойдаланувчилар саломатлигига жиддий хавф туғдириши мумкин.

Тадқиқот натижалари эълон қилинганидан сўнг, "Bose", "Panasonic", "Samsung" ва "Sennheiser" компаниялари мавзу бўйича берилган сўровларга жавоб қайтармаган.