Залужний Зеленский билан ўртасида бошланган зиддият ҳақида гапирди

Украинанинг Буюк Британиядаги элчиси, Украина Қуролли кучларининг собиқ бош қўмондони Валерий Залужний Associated Press агентлигига берган интервюсида президент Владимир Зеленский билан юз берган бир қатор келишмовчиликлар ҳақида гапирди.

Залужнийнинг сўзларига кўра, ўзи ва Зеленский ўртасидаги илк тортишувлар Россиянинг Украина билан катта уруши бошланганидан кейин деярли дарҳол пайдо бўлган. Зиддият 2022 йил кузида Украина Хавфсизлик хизматининг (УХХ) ўнлаб ходимлари Залужний кабинетига тинтув ўтказиш учун келганида жиддий нуқтага етган.

Залужний бу 2022 йил сентябр ойи ўрталарида, Украина Қуролли кучлари мамлакат шимоли-шарқида қарши ҳужум уюштирганида содир бўлганини айтди. Унинг Киевдаги кабинетига УХХ ўнлаб агентлари - у ерда Британия зобитлари бўлган пайтда кириб келган. УХХ ходимлари айнан нимани қидираётганини тушунтирмаган, аммо Залужний уларга ҳужжатлар ва компютерларни текширишга рухсат бермаган. Собиқ бош қўмондоннинг фикрича, тинтув “қўрқитиш ҳаракати” эди.

Залужний, шунингдек, NATO ҳамкорлари билан биргаликда 2023 йил ёзида ишлаб чиқилган қарши ҳужум режаси Зеленский ва бошқа амалдорлар зарур ресурсларни ажратмагани учун муваффақиятсизликка учраганини айтди.

Собиқ бош қўмондоннинг сўзларига кўра, дастлабки режа Запорижжя областини озод қилиш учун етарли кучларни “ягона муштда” тўплаш, кейин эса Азов денгизига чиқиш эди. Бу Россия томонидан аннексия қилинган Қримнинг таъминот йўлини кесиб қўйиш имконини берарди. Залужний фикрига кўра, бунинг учун кенг кўламли, консентрациялашган кучларни тўплаш ва тактик кутилмаган ҳаракатлар керак эди. Бунинг ўрнига, кучлар кенг ҳудуд бўйлаб тарқалиб кетган, бу эса уларнинг ҳужум кучини заифлаштирган.

Залужний ўзининг сиёсий амбициялари ҳақида гапиришдан бош тортади. "Уруш тугамагунча ёки ҳарбий ҳолат бекор қилинмагунча, мен буни муҳокама қилмайман", — деди у.

Валерий Залужний Украинада президентлик сайловлари ўтказилган тақдирда Зеленскийнинг асосий рақиби бўлиши мумкинлиги айтилади. 2026 йил январ ойи бошида натижалари эълон қилинган сўровномага кўра, респондентларнинг 23 фоизи Залужнийга, 20 фоизи Зеленскийга овоз беришга тайёр.