Сўнгги икки ҳафта ичида 1600 дан ортиқ киши Германияга киришда рад жавобини олди

Сўнгги икки ҳафта ичида 1600 дан ортиқ киши Германияга киришда рад жавобини олди.

Бу ҳақда Германиянинг Focys журнали мамлакат Ички ишлар вазирлиги маълумотларига таяниб хабар берди.

Май ойи бошида Германия ички ишлар вазири Александр Добриндт мамлакатнинг қуруқлик чегараларида назоратни кучайтириш ҳақида эълон қилган эди. Добриндтнинг сўзларига кўра, бу рақам унинг вазифага киришишидан аввалги даврга нисбатан 45 фоизга кўп.

"Ҳозирги рақамлар шундан далолат берадики, кучайтирилган чегара назорати самара бермоқда", — деди вазир журналга берган интервюсида. Шу билан бирга, у бу чоралар доимий бўлмаслиги кераклигини ва "заиф гуруҳлар" учун истиснолар амалга оширилишини қайд этган.

Германияга қўшни давлатларнинг айримлари ушбу чораларни танқид қилган. Швейцария ҳукумати Берлин мазкур чораларни олдиндан маслаҳатлашмасдан жорий этганидан "афсусда эканини" билдирди.

"Бу ҳеч қандай маънога эга бўлмаган ҳаракат. Европа Иттифоқининг ички эмас, балки ташқи, яъни Полшанинг шарқий чегараси каби чегараларини мустаҳкамлаш зарур", — дея муносабат билдирди Полша бош вазири Доналд Туск.

Германия парламентида мухолифатда бўлган “Яшиллар” партияси Ички ишлар вазирини чегараларда тартибсизликларни юзага келтирганликда айблади. Партия вазирликка расмий сўров юбориб, Германияга киришнинг янги қоидалари аниқ тушунтирилишини талаб қилди.