Ўзбекистон Соғлиқни сақлаш вазири Амрилло Иноятов бошчилигидаги тизим масъулларидан иборат делегациянинг Беларусь Республикасига хизмат сафари давом этмоқда.
Ташриф доирасидаги навбатдаги манзил Минск хирургия, трансплантация ва гемотология илмий-амалий маркази бўлди.
Вазир ушбу тиббиёт муассасасининг фаолияти билан танишиб, марказ раҳбарияти билан учрашув ўтказди.
Мулоқотда таъкидланганидек, 1976 йилда ташкил этилган ушбу кўп тармоқли тиббиёт муассасасида беморларга 2 000 дан ортиқ малакали тиббиёт ходимлари юқори технологик, шошилинч ва режали тиббий ёрдам кўрсатади.
Муассаса 965 та ўринга мўлжалланган бўлиб, бу ерда 12 та клиник бўлим ва қатор университетлар кафедралари фаолият юритади. Қолаверса, марказда киндик қони ўзак ҳужайралари, кардиожарроҳликда қўллаш учун клапан аллографтлари банклари ташкил этилган.
Минск хирургия, трансплантация ва гемотология илмий-амалий марказида қатор инновацион муолажа усуллари ҳам йўлга қўйилган. Жумладан, мазкур тиббиёт муассасасида жигар трансплантантини тайёрлашнинг комплекс усули ишлаб чиқилган бўлиб, операциядан кейин асоратлар келиб чиқиш хавфини бир неча баробарга камайтириш имконини берди.
Шунингдек, бу ерда Ходжкин лимфомасининг резистент шакллари ёки рецидивига чалинган беморларни гемопоэтик ўзак ҳужайрларинининг тандем аутологик трансплантацияси асосида даволаш усули жорий этилган.
Вазир ва марказ вакиллари ўртасида бўлиб ўтган музокаралар давомида икки томонлама алоқаларни янада кенгайтириш масалалари кўриб чиқилди.
Хусусан, ўзаро мутахассислар алмашинувини йўлга қўйиш, билим ва тажриба алмашиш, шу жумладан икки мамлакатнинг турли ҳудудларида жигар, буйрак трансплантацияси каби қўшма юқори технологик жарроҳлик амалиётларини бажариш бўйича қатор келишувларга эришилди.
Хизмат сафари давом этмоқда.