Слот билан можаро якунланганидан кейинги дастлабки ўйиндаёқ Салоҳ АПЛ рекордини ўрнатди

"Ливерпуль" форварди Муҳаммад Салоҳ АПЛнинг 16-туридан ўрин олган "Брайтон"га қарши ўйинда бир клуб сафида энг кўп голларда иштирок этиш бўйича Англия Премьер-лигаси рекордини ўрнатди. Мисрлик футболчи 26-дақиқада захирадан майдонга тушди, 60-дақиқада эса ҳужумчи Уго Экитикенинг голига ассистентлик қилди.

Шу тариқа Салоҳ "Ливерпуль" сафида АПЛдаги голли ҳаракатлари сонини 277тага етказди (188 гол, 89 ассист). Бунгача рекорд "Манчестер Юнайтед" собиқ форварди Уэйн Рунига тегишли бўлиб, "қизил иблислар" сафида 183 та гол ва 93 та голли узатмага муаллифлик қилганди.

"Брайтон"га қарши ўйин Салоҳ учун бош мураббий Арне Слот билан зиддиятдан кейин сафга қайтганидан кейинги биринчи ўйин бўлди. Жамоадаги роли танқид қилинганидан сўнг, Салоҳ асосий таркибдан четлатилди ва УЕФА Чемпионлар Лигаси доирасидаги "Интер"га қарши ўйинда (1:0) қайдномага киритилмади.