Сирли йўқолган фиръавннинг қабри асрнинг энг катта археологик кашфиётидир

Тутмос II нинг топилиши инсоният тарихини тушунишда улкан ютуқ сифатида баҳоланмоқда.

18 сулоланинг ҳозиргача топилмаган сўнгги ҳукмдори Тутмос II нинг қабри Фива некрополининг Ғарбий водийларида аниқланди.

Тутанхамон қабри топилганидан буён бир асрдан ортиқ вақт ўтиб, археологлар илк бор Миср фиръавнларидан яна бирини кашф этдилар.

Бу топилма кутилмаганда юз берди, чунки археологлар дастлаб қабрни қироллик маликасига тегишли деб ўйлашган эди. Бироқ кенг зинапоя ва нафис безатилган дафн хонасининг мавжудлиги бу жой шоҳона дафн маросими ўтказилганидан далолат бериб, уни узоқ вақтдан бери йўқолган фиръавн мақбараси эканлигини тасдиқлади.

Тутанхамоннинг аждоди бўлган ва қабри 1922 йилда топилган Тутмос II 3500 йил олдин вафот этган бўлиб, Қироллар водийси яқинидаги тоғнинг нариги томонида дафн этилган деб тахмин қилинарди.

Археологлар қирол хотинининг қабрини топганликларига ишонишган эди. Аммо кенг зинапоя ва расмлар билан безатилган дафн хонаси бу жойнинг подшоҳ маскани бўлиши эҳтимоли юқороқлигини кўрсатарди.

Кашфиёт Британиянинг мустақил академик жамғармаси "Янги қироллик тадқиқотлари фонди" (НКРФ) ҳамда Миср Туризм ва қадимий ёдгорликлар вазирлиги томонидан ташкил этилган қўшма миссия томонидан амалга оширилди. Бу лойиҳа Кембриж университетининг Макдоналд археологик тадқиқотлар институти билан ҳамкорликда олиб борилди.

Қабрдан топилган артефактлар, жумладан Тутмос II ва унинг бош маликаси Хатшепсутнинг номлари битилган алебастр идишларнинг парчалари, бу кашфиётнинг ҳақиқийлигини тасдиқлади. Ушбу топилмалар Тутмос II дафн маросими билан боғлиқ ҳозиргача топилган ягона артефактлар ҳисобланади.