Bloomberg агентлиги хабарига кўра, Хитой Халқ Республикаси раиси Си Цзиньпин сўнгги йилларда Хитой армияси — Хитой Халқ-Озодлик Армиясида (ХХОА) кенг кўламли тозалаш ишларини олиб бормоқда. Бу жараён мамлакатда Мао Цзэдун бошқаруви тугаган 1976 йилдан бери генераллар орасида амалга оширилган энг йирик софлаштириш ҳаракати сифатида баҳоланмоқда.
2025 йил апрель ойида Financial Times нашри, ўз манбаларга таяниб, хабар беришича, Си Цзиньпин коррупция айбловлари билан ХХОАнинг иккинчи рақамли генерали Ҳэ Вэйдунни лавозимдан бўшатган. Манбаларнинг бирига кўра, у ҳатто ҳибсга олинган.
Ҳэ Вэйдун Мао Цзэдундан кейинги даврда лавозимдан четлатилган энг юқори мартабадаги ҳарбий шахс бўлгани таъкидланади. Сиёсий-ҳарбий элитанинг асосий органи — Хитой Марказий ҳарбий кенгаши (ЦВС)да аъзолар сони Сининг учинчи муддати бошида еттита бўлган бўлса, ҳозирги тозалашлар натижасида улар сони тўрттагача қисқарган.
Bloombergнинг қайд этишича, Си Цзиньпиннинг биринчи президентлик муддати давомида унинг тайинлаган шахсларига нисбатан ҳеч қандай текширув ўтказилмаган. Иккинчи муддат «нисбатан тинч» деб баҳоланган — бу даврда Си армия устидан назоратни мустаҳкамлаган. Аммо учинчи муддатда у унга шахсан содиқ деб ҳисобланган шахсларни юқори лавозимларга тайинлаб, кейин уларнинг ўзини ҳам лавозимдан олишни бошлаган. Bloomberg бу ҳолатни Мао Цзэдундан бери бирор хитой раҳбари томонидан амалга оширилмаган «беназир қадам» деб атади.
Тозалаш жараёни 2023 йили Ракета қўшинлари қўмондони Ли Юйчаонинг кутилмаган тарзда ишдан олиниши билан бошланган.
Маълумот учун, Си Цзиньпин 2023 йили Конституцияга киритилган ўзгаришлар орқали тарихда биринчи марта учинчи президентлик муддатига қайта сайланган Хитой раҳбари бўлди.
Мактабларда 1 сентябрдан смартфондан фойдаланиш тақиқланади
Кейинги 5 йил ичида бошланиши мумкин бўлган 5 та уруш
АҚШ Конгрессига номзод Валентина Гомес Қуръонни ёқиб юборди
