Швейцария банки Россия элитасига хизмат кўрсатгани учун жазоланди

Швейцария молиявий регулятори FINMA Julius Baer хусусий банки фаолиятида пул ювиш ва терроризмни молиялаштиришга қарши талаблар бузилиши юзасидан текширувни якунлади.

Текширувда банк россиялик сиёсий жиҳатдан муҳим шахсларнинг активлари келиб чиқишини етарлича текширмагани аниқланган. Шунингдек, австриялик тадбиркор Рене Бенконинг банкрот бўлган Signa гуруҳига берилган 700 миллион долларлик кредитларни ҳисобдан чиқариш ҳолатлари ҳам мавжуд.

Қоидабузарликлар сабабли банк қўшимча 300 миллион доллар капитал сақлаши шарт. FINMA, шунингдек, Julius Baer ушбу мижозлар гуруҳлари билан ишлашдан олган қарийб 12 миллион доллар даромадини мусодара қилади. Банк устидан кучайтирилган назорат 2032 йилгача давом этади.