Шахмат: Афруза Ҳамдамова жаҳон чемпионати совриндори бўлишга яқин

Бугун, 7 март куни Черногориянинг Петровац шаҳрида 20 ёшгача бўлган шахматчилар ўртасида ўтаётган жаҳон чемпионатининг ғолиб ва совриндорлари аниқланади.

Кеча поёнига етган 10-турда Ўзбекистон терма жамоаси аъзоларидан эркаклар ўртасида Муҳаммадзоҳид Суяров оқ доналарда венгриялик Матьяс Пальцертни доғда қолдирди. Ҳумоюн Бекмуратов, Асроржон Омонов ва Миразиз Матёқубов рақиблари билан муроса йўлини танлади.

Жаҳон чемпионатининг аёллар баҳсида ҳамюртларимиздан Афруза Ҳамдамова оқ доналарда Кесария Мгеладзени мағлуб этиб, очколари сонини 7 тага етказиб олди.

Қолган шахматчи қизларимиздан Гулдона Каримова дурангга эришган вазиятда Умида Омонова, Нилуфархон Имомқўзиева ва Барчиной Шокиржонова рақибларига ютқазиб қўйди.

Афруза Ҳамдамованинг ушбу ғалабаси уни 20 ёшгача бўлганлар ўртасида дунё биринчилигининг совриндорларидан бирига айлантириш имкониятини оширди, дейиш мумкин. Боиси, ғолиблик йўлида 8 очко билан етакчилик қилаётган Анна Шухман бугун ўтадиган 11-турда 7,5 очкога эга қозоғистонлик Алуа Нурманни енгса, ва албатта Ҳамдамова ушбу турда озарбайжонлик Аян Аллахвердиевадан устун келса, шунингдек 7 очколи қолган 2 та жуфтликдаги баҳслар дуранг билан якунланса, камида 3-ўриндан жой олиши мумкин бўлади.