Миллионер! Ҳусанов “Сити”да жами қанча маош олади?

Франциянинг L’Équipe спорт нашри Англия Премьер-лигасидаги энг юқори маош олувчи 5 нафар футболчидан иборат рейтингни эълон қилди. Уларнинг топаётган даромадига бошқа лига вакиллари ҳавас қилса арзийди.

Ушбу рўйхатни “Манчестер Сити” ҳужумчиси Эрлинг Холанд бошқармоқда. Норвегиялик тўпурарнинг ойлик маоши 2,63 миллион еврони ташкил қилади.

АПЛда ойлик энг юқори маош олувчи ТОП-5 футболчилар рўйхати қуйидагича:

1. Эрлинг Холанд (“Манчестер Сити”) — 2,63 миллион евро.
2. Муҳаммад Салоҳ (“Ливерпуль”) — 2 миллион евро.
3. Каземиро (“Манчестер Юнайтед”) — 1,75 миллион евро.
4. Виржил ван Дейк (“Ливерпуль”) — 1,75 миллион евро.
5. Бруну Фернандеш (“Манчестер Юнайтед”) ва Букайо Сака (“Арсенал”) — 1,5 миллион евродан.

Ўзбекистонлик футбол ишқибозларини Англия Премьер-лигасида ўйнаётган ҳамюртимиз Абдуқодир Ҳусановнинг маоши қизиқтириши табиий. 22 ёшли футболчимиз, табиийки, Премьер-лига юлдузлари даражасида даромад топмайди ва катта маош олувчи ўйинчилар рейтингида кўринмайди.

Бироқ шуни таъкидлаш жоизки, Capology портали аввалроқ Ҳусановнинг “Манчестер Сити”даги маоши ҳақидаги маълумотларни эълон қилган эди. Футболчи Англияда йилига 3,8 миллион евро ишлайди.

“Манчестер Сити” билан 2029 йилнинг 30 июнигача имзоланган шартнома давомида Абдуқодир жами 15,2 миллион евро ишлаб топади. Бу сумма клуб ўзбек футболчиси билан келишувни янгилаганда ўзгариши мумкин.

Эслатиб ўтамиз, Абдуқодир Ҳусанов ўзининг биринчи профессионал клуби – Беларуснинг “Энергетик-БГУ” жамоасида ўйнаган даврида ва кейинчалик Франциянинг “Ланс” клубига кўчиб ўтганидан кейин ҳам бундан анча паст миқдордаги маошга ўйнаган.

Англия Премьер-лигаси клублари жаҳон футболида ўйинчиларга энг кўп маош бериши билан ажралиб туради.