Сербия ва Исроилнинг Elbit Systems компанияси жанговор учувчисиз аппаратларни биргаликда ишлаб чиқаришни режалаштирмоқда. Бироқ бу мақсадда ташкил этилиши керак бўлган қўшма корхона ҳозирча расман рўйхатдан ўтказилмаган.

Сербия президенти Александр Вучич аввалроқ қўшма корхона сентябрь ойида иш бошлашини айтган. Унинг маълум қилишича, компанияда томонларнинг улушлари тенг бўлиши керак. Бироқ BIRN маълумотларига кўра, Elbit Systems 51 фоиз, Сербия давлат компанияси «Югоимпорт-СДПР» эса 49 фоиз улушга эга бўлиши режалаштирилган.

Сербияда ишлаб чиқарилиши мумкин бўлган дронлар орасида LANIUS-X ҳам тилга олинмоқда. Мамлакат Мудофаа вазирлиги уни сунъий интеллектга эга, қисқа масофага мўлжалланган зарбдор дрон сифатида тақдим этган.

Қурилма GPS сигнали бўлмаган шароитда, ҳатто бинолар ичида ҳам ҳаракатлана олади. У оптик ва лазер сенсорларидан фойдаланиб, махсус операциялар ҳамда шаҳар шароитидаги жанговор ҳаракатлар учун мўлжалланган.

Elbit Systems маълум қилишича, қуролни қўллаш ва ҳалокатли куч ишлатиш ҳақидаги қарорни дроннинг ўзи эмас, балки оператор қабул қилади.