Руминия президенти: Констанца портида портлаган дрон Украинага тегишли бўлган

Руминия президенти Никушор Дан Констанца фуқаролик порти ҳудудида портлаган денгиз дрони Украинага тегишли бўлганини расман тасдиқлади.

Унинг сўзларига кўра, мазкур аппарат портловчи моддалар билан жиҳозланган тўртта Украина денгиз дронидан иборат гуруҳ таркибига кирган.

«Энди аниқ бўлдики, бу портловчи моддалар билан тўлдирилган тўртта Украина дрони гуруҳи таркибидаги Украина дрони бўлган. Унинг устидан назорат йўқотилган», — деди Дан йиғилиш давомида.

Президентнинг таъкидлашича, дрон Констанца портига сезилмасдан кириб келган. У буни Руминияда ҳозирча тўлиқ қарши чоралар ишлаб чиқилмаган янги технология тури экани билан изоҳлади.

5 июнь куни Констанца порти яқинида денгиз дронининг ўз-ўзидан портлаши ҳақида хабарлар тарқалган эди. Кейинчалик Украина Қуролли кучлари тўртта денгиз дрони устидан назорат йўқотилганини тасдиқлади.

Маълумотларга кўра:

• Биринчи дрон Констанца порти ҳудудида портлаган;
• Иккинчиси порт яқинидаги очиқ денгизда йўқ қилинган;
• Учинчи ва тўртинчи дронлар эса Констанцадан тахминан 145 километр шарқда портлаган.

Ҳодиса Қора денгиздаги хавфсизлик масалаларига яна бир бор эътибор қаратди. Руминия НАТО аъзоси бўлгани сабабли воқеа минтақада катта қизиқиш уйғотмоқда. Бугунча портлашлар натижасида қурбонлар ҳақида маълумот берилмаган.