Ruminiya prezidenti: Konstansa portida portlagan dron Ukrainaga tegishli bo‘lgan

Ruminiya prezidenti Nikushor Dan Konstansa fuqarolik porti hududida portlagan dengiz droni Ukrainaga tegishli bo‘lganini rasman tasdiqladi.

Uning so‘zlariga ko‘ra, mazkur apparat portlovchi moddalar bilan jihozlangan to‘rtta Ukraina dengiz dronidan iborat guruh tarkibiga kirgan.

«Endi aniq bo‘ldiki, bu portlovchi moddalar bilan to‘ldirilgan to‘rtta Ukraina droni guruhi tarkibidagi Ukraina droni bo‘lgan. Uning ustidan nazorat yo‘qotilgan», — dedi Dan yig‘ilish davomida.

Prezidentning ta’kidlashicha, dron Konstansa portiga sezilmasdan kirib kelgan. U buni Ruminiyada hozircha to‘liq qarshi choralar ishlab chiqilmagan yangi texnologiya turi ekani bilan izohladi.

5 iyun kuni Konstansa porti yaqinida dengiz dronining o‘z-o‘zidan portlashi haqida xabarlar tarqalgan edi. Keyinchalik Ukraina Qurolli kuchlari to‘rtta dengiz droni ustidan nazorat yo‘qotilganini tasdiqladi.

Ma’lumotlarga ko‘ra:

• Birinchi dron Konstansa porti hududida portlagan;
• Ikkinchisi port yaqinidagi ochiq dengizda yo‘q qilingan;
• Uchinchi va to‘rtinchi dronlar esa Konstansadan taxminan 145 kilometr sharqda portlagan.

Hodisa Qora dengizdagi xavfsizlik masalalariga yana bir bor e’tibor qaratdi. Ruminiya NATO a’zosi bo‘lgani sababli voqea mintaqada katta qiziqish uyg‘otmoqda. Buguncha portlashlar natijasida qurbonlar haqida ma’lumot berilmagan.