Руминия мудофаа вазири резюмесига дипломи ҳақида ёлғон маълумот киритгани сабаб истеъфога чиқди — ОАВ

Йонуц Моштяну атрофидаги можаро Libertatea нашри шу ҳақда хабар берганидан кейин юзага келди. Нашр маълумотларига кўра, у расмий резюмесида 1990-йиллар охирида Бухарестдаги Athenaeum университетида “менежмент” ихтисослиги бўйича ўқиганини даъво қилган. Аммо университет журналистларга бундай талаба умуман бўлмагани, ушбу ихтисослик эса ўқув дастурида фақат 2020 йилдан бошлаб пайдо бўлганини билдирди.

Моштяну Libertatea нашридаги маълумотлар тўғрилигини тан олди ва 27 ноябр куни бўлиб ўтган воқеа учун узр сўраб, ўшанда бу тафсилотларга катта эътибор қаратмаганини айтди. У яширадиган ҳеч нарсаси йўқлигини таъкидлаб, ижтимоий тармоқларда Bioterra университети бакалавр дипломини эълон қилди. Кейинги куни эса у истеъфога чиққанини маълум қилди.

Руминия бош вазири Илие Боложан Йонуц Моштянунинг бош вазир ўринбосари ва мудофаа вазири лавозимларидан истеъфосини қабул қилганини, мудофаа вазирлигини эса вақтинча амалдаги иқтисодиёт ва туризм вазири Раду Мируцэ бошқариб туришини маълум қилди.