Руминия бош вазири Марчел Чолаку ўзи раҳбарлик қилаётган Социал-демократик партия (PSD) ҳукмрон коалиция таркибидан чиқишини ҳамда ўзининг лавозимини тарк этишини маълум қилди. Чолаку бу ҳақда 5 май куни партия йиғилишидан сўнг журналистларга хабар берди.
"Кеча руминияликларнинг президентлик сайловида овоз бериши натижаларини кўрдим. Бу шуни англатадики, ҳукмрон коалиция, ҳеч бўлмаганда ҳозирги таркибда, қонунийликка эга эмас. Мен ҳамкасбларимга ҳукмрон коалисиядан чиқишимизни билдирдим. Бу билвосита менинг бош вазир лавозимидан истеъфога чиқишимга олиб келади", — дейди Чолаку.
Руминияда 4 май куни такрорий президентлик сайловларининг биринчи тури бўлиб ўтди. Унда ўта ўнгчи “Руминларни бирлаштириш иттифоқи” номзоди Жорже Симион ғалаба қозонди. Иккинчи ўринни Бухарест мэри Никушор Дан эгаллади. Ҳукмрон коалициядан номзод Крин Антонеску учинчи ўринни эгаллади.
Антонеску ўзининг ғарбпараст Сосиал-демократик партияси (PSD) президентлик сайловларининг иккинчи турида ғолиб бўлган икки номзоднинг ҳеч бирини очиқ-ошкора қўллаб-қувватламаслик тўғрисида қарор қабул қилганини маълум қилди.
Марчел Чолакунинг айтишича, 18 май куни сайланадиган келажак президент "парламентда кўпчиликни шакллантира оладиган партиялар билан биргаликда бош вазир лавозимини ким эгаллашини ҳал қилади.
