Рубио: АҚШнинг урушни тўхтатиш бўйича режаси Россия ва Украинанинг таклифларига асосланган

АҚШ давлат котиби Марко Рубио Украинадаги урушни тугатиш бўйича Америка режаси АҚШ томонидан «Россия томонининг таклифи асосида», шу билан бирга «Украинанинг олдинги ва ҳозирги таклифлари»ни ҳисобга олган ҳолда ишлаб чиқилганини билдирди.

«Тинчлик учун хавола этилган таклиф АҚШ томонидан ишлаб чиқилган. У давом этаётган музокаралар учун мустаҳкам асос сифатида таклиф қилинмоқда. У Россия томонининг таклифларига асосланган. Лекин у шунингдек Украинанинг аввалги ва амалдаги таклифларига ҳам таянади», — деб ёзди Рубио Х ижтимоий тармоғида.

Шанба куни республикачи сенатор Майк Раундс Галифаксдаги халқаро хавфсизлик конференциясида Рубио унга ва бошқа сенаторларга қўнғироқ қилиб, бу таклиф АҚШ томони олган ва Украинага етказган таклиф эканини айтганини маълум қилди.

«У бизга ушбу таклиф бизнинг вакилимиздан бирига етказилган ҳужжат эканини очиқ айтди, — дея Раундснинг сўзларини Reuters келтиради. — Бу бизнинг тавсиямиз ҳам эмас, бизнинг режамиз ҳам эмас».