Россиянинг Европа Иттифоқидаги активлари Украинага товон пули тўланмагунча музлатилди

Европа Иттифоқи кенгаши Россия активларини "уруш тугагунча ва Украинага товон пули тўланмагунча" музлатиб қўйишга қарор қилди.

Бу ҳақда Европа кенгаши президенти Антониу Кошта ўзининг ижтимоий тармоғида ёзди.

Унинг таъкидлашича, "23 октябрь саммитида ЕИ етакчилари Россия-Украина уруши тугагунига қадар ва етказилган зарар тўлиқ қопланмагунча Россия активлари музлатилиши кераклигини эълон қилган эди.

"Бугун биз бу ваъдани бажардик", деб ёзади Кошта.

Аввалроқ, ЕИ Кенгашидаги Дания раислиги ЕИ кенгаши "Россия активларини муддатсиз музлатиш"ни маъқуллаганини маълум қилганди.