Россиянинг дўсти, Исроил разведка хизматининг собиқ раҳбари: «Россия армиясига уят!»

Исроилнинг «Натив» разведка хизматининг собиқ раҳбари, ҳозирда машҳур россиялик тарғиботчи Яков Кедми Украина қуролли кучларининг Россия Федерациясининг Курск вилоятидаги ҳужуми ҳақида фикр билдирди.

Кедми Курск операциясининг асосий мақсади «тарғибот» деб ҳисоблайди. Ва Украина кучлари буни ажойиб тарзда амалга оширди.

«Биринчи нарса шундаки, Россия армияси кучсиз. Иккинчиси, Украина армияси кучли. Улар муваффақиятга эришдилар! Уларни у ердан улоқтиришни бошлашмади... Украина армияси Россия Бош штаби ва Россия раҳбарияти кутганидан анча кучлироқ бўлиб чиқди», — деди Кедми.

Унинг таъкидлашича, уруш пайтида Украина бир неча бор бундай тезкор ҳужумларини фронтда муваффақият билан амалга оширган.

«Россия Украинани мағлуб эта олмайди. Россия ўз ҳаракатлари билан Украина ҳимоясини ёриб ўтиб, ғалаба қозона олмаслигини исботламоқда. Россия кичик Украинани мағлуб эта олмади. Дунёдаги энг кучли армияга эга эканлиги билан мақтанадиган Россия Украина армиясига дош бера олмади», - дейди Кедми.

Унинг фикрича, Кремль бу урушда ўз мақсадларига эриша олмайди. Украина бу урушдан омон қолгани ва давлат сифатида сақланиб қолгани аллақачон аён.