Россиянинг Биринчи канали мухбири Белгород вилоятида мина портлаши оқибатида ҳалок бўлди

Россиянинг Биринчи канали мухбири Анна Прокофева Белгород вилоятида мина портлаши оқибатида ҳалок бўлди. Телеканал маълумотларига кўра, бортида ўз ходими бўлган машина “таҳририят топшириғини” бажараётиб, Украина билан чегара яқинида “душманнинг портловчи қурилмаси” устига бориб урилган. Телеграм каналлари хабарига кўра, портлаш Демидовка қишлоғида содир бўлган.

Прокофиева 35 ёшда эди. У мунтазам равишда Россия томонидан назорат қилинадиган Украина ҳудудларидаги воқеаларни ёритиб турди ва ўлимидан бироз олдин у Суджада Украина қўшинларининг Курск вилоятидан олиб чиқилиши ҳақидаги ҳисобот устида ишлаган.

Россия Ташқи ишлар вазирлигининг расмий вакили Мария Захарова Киевни россиялик журналистларни "оммавий" мақсадли таъқиб қилишда айблади.

Бир кун аввал Москва Украинани Луганск вилоятида суратга олиш гуруҳини ўққа тутишда айблаган эди. Икки журналист Александр Федорчак ва Андрей Панов, шунингдек, уларнинг ҳайдовчиси Александр Cиркели ҳалок бўлди.

Киев бу воқеаларга изоҳ бермади.