Россияни четлаб ўтишмоқда: Хитой ва Қозоғистон Европага темир йўл қурди

Қозоғистон ва Хитой Россияни четлаб ўтувчи, Европага юк ташишга мўлжалланган янги темир йўл йўналишини ишга туширмоқда. Бу ҳақда сешанба куни Қозоғистон темир йўллари матбуот хизмати маълум қилди.

Хитойнинг China Railway Container Транспорт компанияси билан ҳамкорликда амалга оширилаётган лойиҳа доирасида Хитойдан жўнатилган контейнер поездлари Туркманистон, Қозоғистон, Эрон ва Туркия ҳудудлари орқали ўтиб, сўнг Европа мамлакатларига йўл олади.

Янги йўналиш бўйича биринчи поезд Хитойнинг Ченгду шаҳридан Полшанинг Лодз шаҳрига жўнаб кетди. "Бу йўналиш юкларни узлуксиз етказиб бериш ва мамлакатлар ўртасида самарали алоқани таъминлайди. Йўлда кетадиган вақт тахминан 40 кун бўлиши кутилмоқда," - дея таъкидланди Қозоғистон темир йўллари матбуот хизмати хабарида.

The Moscow Times нашрининг ёзишича, Хитой бир вақтнинг ўзида Россияни четлаб ўтувчи, Марказий Осиё давлатлари орқали ўтадиган яна иккита темир йўл лойиҳасини ривожлантирмоқда.

Биринчиси - Транскаспий халқаро транспорт йўналиши 2023 йилнинг ёзида келишилган бўлиб, у Қозоғистон, Каспий денгизи акваторияси, Озарбайжон ва Грузия орқали ўтади.

Иккинчиси Қирғизистон ва Ўзбекистон орқали Каспий денгизигача темир йўл қуришни назарда тутади, у ердан Туркия орқали юклар Европа Иттифоқига етказилади. Шунингдек, Форс кўрфази мамлакатлари темир йўллари билан боғлаш режалаштирилган 8 миллиард долларлик лойиҳа 2024 йил июнь ойида тасдиқланган бўлиб, уни Хитойнинг China Railway International компанияси амалга оширади.

Илгари Хитойдан Европага юклар Қозоғистон, Россия ва Беларус орқали темир йўл орқали олиб ўтиларди. Бироқ, Украинада уруш бошланганидан бери баъзи компаниялар Россия ҳудудидан транзит учун фойдаланишни тўхтатди, деб таъкидлади Вашингтондаги Jamestown Foundation таҳлил маркази.