Россиялик депутат Қирғизистонни "сурбетлашган ташкилот" деб атади. Жанжал кўтарилди

Қирғизистон парламенти депутати Дастан Бекешев Россия Давлат думаси депутати Михаил Матвеевни расмий Бишкекка нисбатан айтган гаплари учун персона нон грата деб эълон қилишни таклиф этди.

Бундан олдин Матвеев Ўшдаги Рус уйи ходимининг қамоққа олинишини шарҳлаётиб, RTVI’га берган интервьюсида шундай деган эди: "Буюк давлатда ўзини беадабларча тутаётган кичик сурбет ташкилотни жойига қўйишнинг миллионлаб усуллари бор."

Шунингдек, у Марказий Осиё давлатлари Россияга қарам бўлишига қарамай, унга нисбатан "умуман олганда ўзларини етарлича беадабона тутишаётганини" таъкидлади ва қўшимча қилди: "Менимча, масалан, Қирғизистонга Россия банкларидан пул ўтказмаларини тўхтатиш ва чеклаш осон иш."

Бекешев бундай баёнотларни нодипломатик ва хавфли деб баҳолади: "Михаил Матвеевга ўхшаганлар мамлакатларимиз ўртасига нифоқ солмоқда. Менимча, бундай фикрларга Россия ҳукумати томонидан чек қўйилиши лозим. Ташқи ишлар вазирлигимиз эса Россия элчисини чақириб, унга нота топшириши ва Матвеевни персона нон грата деб эълон қилиши керак."

Эслатиб ўтамиз, Қирғизистонда ёлланма аскарларни ёллаш иши бўйича тўрт киши қамоққа олинган эди. Улар орасида Рус уйи ходими Наталя Секерина ва Ўш шаҳар ҳокимлиги матбуот котиби Сергей Лапушкин ҳам бор.