Россияда мигрантлар учун қўшимча давлат божи жорий этилди

Россия президенти Владимир Путин мигрантлар учун қўшимча давлат божи жорий этиш ва амалдагилар сонини ошириш тўғрисидаги қонунни имзолади.

RG.ru сайти хабар беришича, шу жумладан, чет эл фуқаросини турган жойи бўйича рўйхатдан ўтказиш учун давлат божини жорий этиш, шунингдек, чет эл фуқаросини яшаш жойи бўйича рўйхатга олиш учун давлат божи миқдорини ошириш режалаштирилмоқда.

Аввалроқ Давлат Думаси раиси Вячеслав Володин бу каби янгиликлар бюджетга маблағлар оқимини ошириши, шунингдек, мигрантлар устидан назоратни кучайтириши ҳақида айтганди. Уларнинг ҳақиқий яшаш жойларини аниқлаш осонроқ бўлади, бу эса ўз навбатида ноқонуний миграция даражасини пасайтиришга ёрдам беради, дея тушунтирди маърузачи.

Давлат божи қуйидаги миқдорда тўланади:

- чет эл фуқаросини Россия Федерациясида яшаш жойи бўйича рўйхатдан ўтказиш учун - 1000 рубль миқдорида (ҳозирда - 420 рубль;

- чет эл фуқаросини яшаш жойида рўйхатдан ўтказиш учун - 500 рубль ;

- мамлакатда вақтинча бўлиш муддатини узайтириш учун - 1000 рубль;

- чет эллик ишчиларни ёллаш учун дубликат рухсатномалар берганлик, тегишли рухсатномалардаги маълумотларга ўзгартиришлар киритганлик учун – 2100 рубль;

- мигрантга берилган ишлаш рухсатномасининг амал қилиш муддатини узайтириш учун - 4200 рубль;

- бундай ҳужжатнинг дубликатини бериш ва ўзгартиришлар киритиш учун - 2100 рубль;

- чет эл фуқаросига патент бериш ёки қайта расмийлаштириш учун - 4200 рубль;

- патентнинг дубликати ва ўзгартиришлари учун - 2100 рубль.

Шу билан бирга, чет эл фуқароларини рўйхатга олишнинг қўшимча механизмларини жорий этиш бўйича эксперимент иштирокчиси бўлган шахсларга чет эл фуқаросини турган жойида рўйхатдан ўтказиш учун йиғим қўлланилмайди.

Россия Федерациясига виза талаб қиладиган тарзда келган чет эл фуқаросининг вақтинча бўлиш муддатини узайтириш учун давлат божи тўланмайди.

Қонун 2025 йил 1 сентябрдан кучга киради, лекин расмий эълон қилинган кундан бошлаб бир ойдан кечиктирмай.

Янги давлат божлари амалдагиларни тўлдиради. Вячеслав Володин аввалроқ эслатганидек, Россияга амалдаги қоидаларга мувофиқ ишлаш учун визасиз мамлакатлардан келган фуқаролар патент олишлари керак, унинг нархи ойига ўртача 8-10 минг рубльни ташкил қилади. Шу билан бирга, виза олган мамлакатлардан келган мигрантлар ишлаш учун рухсатнома оладилар.

Даромад рақамли ахборот тизимларини ривожлантириш ва миграция хизмати ходимларининг малакасини оширишга йўналтирилиши мумкин.