Россияда бензин сотиш бўйича чекловлар бекор қилиниши мумкин

Россия ҳукумати бензинни бир харидорга сотиш бўйича жорий этилган чекловларни юмшатиш имкониятини кўриб чиқмоқда. Бош вазир ўринбосари Александр Новак Энергетика вазирлиги ва нефть компанияларига бир шахсга 50 литрдан кам бензин сотиш чекловларини бекор қилиш масаласини ишлаб чиқишни топширди.

Топшириқ ёқилғи бозоридаги вазиятга бағишланган йиғилиш якунлари бўйича берилган. Манбаларга кўра, вазирликка автойўқилғи қуйиш шохобчалари ходимлари томонидан амалдаги чекловларни четлаб ўтишнинг олдини оладиган механизм ишлаб чиқиш ҳам юклатилган.

Июнь ва июль ойларида Россиянинг 80 та ҳудудида бензин сотиш бўйича турли чекловлар амал қилган. Айрим автойўқилғи қуйиш шохобчаларида ҳайдовчиларга бир мартада атиги 20–30 литр бензин сотилган.

Сўнгги ҳафталарда вазият нисбатан яхшилангани қайд этилмоқда. Қатор ҳудудларда лимитлар оширилди, вақт бўйича чекловлар, электрон навбатлар, талон тизими ва «жуфт-тоқ» тамойили бўйича сотиш амалиёти бекор қилинди.

Аввалроқ Александр Новак ёқилғи тақчиллигини нефтьни қайта ишлаш заводларига берилган зарбалар оқибатида айрим корхоналарнинг вақтинча ишдан чиққани билан изоҳлаган эди. 22 июль куни Россия президенти Владимир Путин ёқилғи бозоридаги муаммолар вақтинчалик эканини билдирган.

Бозор иштирокчилари фикрича, янги топшириқ энг қатъий чекловларни бекор қилишга қаратилган. Агар чекловлар сақлаб қолинса, энг кам лимит 50 литр ёки ундан юқори даражада белгиланиши мумкин.

Мутахассисларнинг таъкидлашича, бозордаги вазият нефтьни қайта ишлаш заводлари Украина ҳужумларидан кейин ўз фаолиятини қай даражада тез тиклай олишига боғлиқлигича қолмоқда.

Bloomberg маълумотларига кўра, сўнгги уч ой давомида Украина Россиядаги нефтьни қайта ишлаш заводларига қарийб 50 марта ҳужум уюштирган. Натижада 34 та йирик заводдан камида 24 таси зарар кўрган. Шу сабабли июнь ойида Россияда нефтьни қайта ишлаш ҳажми сўнгги 21 йилдаги энг паст даражага тушган, бензин ва дизель ёқилғиси тақчиллашган, нархлар эса ўсишда давом этмоқда.