Россия “Ягодино” назорат-ўтказиш пунктидаги ёнилғи қуйиш шохобчаси ва поездга дронлар билан зарба берди

Украина оммавий ахборот воситаларининг хабар беришича, автомобилларга ёнилғи қуйиш шохобчасида кучли ёнғин рўй берган. Унинг атрофида турган юк машиналари ёниб кетган. “Суспильне” нашри маълумотига кўра, икки ҳайдовчи жароҳат олган. Шунингдек, супермаркет биноси шикастланган. “Ягодино” – Украина ва Полша ўртасидаги муҳим автомобил ўтиш нуқталаридан бири ҳисобланади.

Бундан ташқари, Россия армияси Полша билан чегарадан икки километр масофадаги йўловчи поезд локомотивига ҳам зарба берган. Украина Темирйўллари матбуот хизматининг хабар қилишича, поезд бригадаси зарба хавфи ҳақида огоҳлантирилганди, шунинг учун қурбонлар бўлмаган.

Украина Темирйўллари раҳбари Олександр Персовскийнинг таъкидлашича, Россия қўшинлари иккинчи кундирки темирйўл инфратузилмасига – деполар, станциялар ва вагонларга узлуксиз ҳужум қилмоқда.

Украина ташқи ишлар вазири Андрей Сибига Россиянинг Украина-Полша чегараси яқинидаги зарбалари "Путиннинг тўғридан тўғри Европа Иттифоқи ва NATO эшикларини тақиллатаётган террори" эканини таъкидлади. "Россия варварлари аллақачон дарвозаларингизда, қадрли ҳамкорлар", — деди Сибига. У Европа давлатларини "ўз санкцияларининг бутун кучини Путиннинг тажовузкор режимига қарши" ишлатишга, жумладан, тўлиқ савдо эмбаргоси ва россияликларнинг киришини тўлиқ тақиқлашга чақирди.

Россия мудофаа вазирлиги Украинанинг ғарбий ҳудудларида "Европа мамлакатларидан ҳарбий юкларни ташишни таъминлайдиган темирйўл инфратузилмаси объектлари"га зарбалар берилганини билдирган.