Россия томонида жанг қилаётган кенияликлар сони мингдан ошган

Кения Миллий разведка хизмати парламентга тақдим қилган ҳисоботга кўра, жами 1000 нафар кениялик Россия армияси томонидан Украинадаги урушда қатнашиш учун сафарбар қилинган.

2026 йил феврал ойида 89 нафар кениялик фронт чизиғида бўлган. Аввалроқ мамлакат ҳукумати тўлиқ миқёсдаги уруш бошланганидан бери Россия томонида тахминан 200 нафар кениялик жанг қилгани ҳақида хабар берган эди.

Ҳисоботда таъкидланишича, сафарбар қилувчи агентликлар Кения аэропортлари ходимлари, иммиграция хизмати ва куч ишлатиш идоралари билан ҳамкорлик қилиб, янги ёлланганларни Россияга муаммосиз юборишган.

Шунингдек, ҳисоботда Найроби шаҳридаги Россия элчихонаси ва Москвадаги Кения элчихонасининг сафарбарлик жараёнига алоқадорлиги келтирилган.

Олдинроқ Россия кенияликларни Украинадаги ҳарбий ҳаракатларда қатнашиш учун сафарбар қилинишида ўзининг алоқадорлигини инкор этган эди.

Ҳисоботда урушга янги юборилганларнинг тақдири ҳақида маълумот берилмаган, аммо фронт чизиғида бўлганлардан ташқари 35 киши Россиядаги ҳарбий тайёргарлик лагерларига жўнатилгани, 39 киши жароҳат олгани ва 28 киши бедарак йўқолгани қайд этилган.

Маълумотларга мувофиқ, янги сафарбар қилинганларга ойига 350 минг Кения шиллинги (тахминан 2,4 минг доллар) тўланиши ва бонус сифатида 1,2 миллион шиллинггача (8,3 минг доллар) берилиши ваъда қилинган.

Найроби аэропортида назорат кучайтирилгач, фуқароларни Жанубий Африка, Уганда ва бошқа қўшни давлатлар орқали Россияга юбориш бошланган.

Кения ҳукумати терговнинг давом этаётганини маълум қилди. Мамлакат Ташқи ишлар вазири BBC'га берган интервьюсида ноқонуний сафарбарликни тўхтатиш учун Россия билан яқиндан ҳамкорлик қилаётганини айтди.