Риши Сунак Британияни Арктикадаги Россия ҳарбий базаларига зарба беришга тайёр туришга чақирди

Буюк Британия Москва томонидан юзага келиши мумкин бўлган таҳдидларни жиловлаш мақсадида Арктикадаги Россия ҳарбий базаларига зарба беришга тайёр бўлиши керак.

Бу ҳақда Буюк Британиянинг собиқ бош вазири Риши Сунак The Sunday Times газетаси учун ёзган мақоласида маълум қилган.

Унинг сўзларига кўра, Россия Шимолий флот жойлашган ва ядровий кучларининг катта қисми тўпланган Кола яриморолидаги ҳарбий ҳозирлигини кучайтирмоқда. Шу билан бирга, Сунакнинг таъкидлашича, Россия ҳарбий-денгиз кучларининг Буюк Британия қирғоқлари яқинидаги фаоллиги 41 фоизга ошган.

Собиқ бош вазирнинг фикрича, асосий таҳдид Шимолий Атлантика устидан назоратни йўқотиш эҳтимоли билан боғлиқ. Бу қуролли можаро юзага келган тақдирда АҚШ қўшинлари ва ҳарбий техникасини Европага жойлаштиришни қийинлаштириши мумкин.

У, шунингдек, халқаро интернет-трафикнинг катта қисмини узатишни таъминлайдиган сув ости алоқа кабелларига нисбатан мавжуд таҳдидлардан ҳам огоҳлантирган.

Шу муносабат билан Сунак сув остидаги кузатув тизимини кучайтириш, Шимолий Европа давлатлари билан қўшма операцияларни кенгайтириш ва Британия махсус кучларини Арктикадаги ҳаракатларга тайёрлашни таклиф қилган.

«Биз Россияга можаро юзага келган тақдирда унинг ҳарбий базаларига таҳдид солиш имкониятига эга эканимизни кўрсатишимиз керак», — деб таъкидлаган у.

Сунакнинг фикрича, Россия ва Украина ўртасидаги можаро қандай якунланишидан қатъи назар, Москва Ғарб давлатларининг юзага келадиган таҳдидларга жавоб беришга тайёрлигини синашда давом этади.

Шу сабабли у Россия ҳарбий инфратузилмасига зарба бериш имкониятини ҳам тийиб туриш стратегиясига киритишга чақирган.