Reuters: АҚШнинг Украина бўйича 28 бандлик тинчлик режаси Россиядан олинган ҳужжат асосида тузилган

Украинадаги урушни тўхтатишга қаратилган ва АҚШ томонидан қўллаб-қувватланаётган 28 бандлик тинчлик режаси Россия муаллифлари томонидан ёзилган ва октябр ойида Трамп маъмурияти олган меморандумга асосланган, дея хабар бермоқда агентлик вазиятдан хабардор учта манбага таяниб

Расмий мақомга эга бўлмаган ушбу ҳужжатда Кремл илгари музокараларда илгари сурган бандлар, жумладан, Украинанинг ҳудудий ён беришлари ҳақидаги талаблар мавжуд бўлган.

Reuters маълумотига кўра, АҚШ давлат котиби Марко Рубио ва Россия ташқи ишлар вазири Сергей Лавров телефон орқали мулоқотда айнан шу меморандумни муҳокама қилишган. Россияликлар томонидан ёзилган ушбу ҳужжат кейинчалик 28 бандлик режанинг асосини ташкил қилган.

Агентлик манбаларининг маълум қилишича, АҚШ президенти Доналд Трампнинг махсус вакили Стив Уиткофф ва куёви Жаред Кушнер ҳамда Россия музокарачиси Кирилл Дмитриев учрашуви чоғида режанинг аксарият қисми ишлаб чиқилган. Давлат департаменти ва Оқ уйдаги жуда кам одам бу учрашувдан хабардор бўлган.

Шунга қарамай, Женевада Украина ва Европа делегациялари билан бўлиб ўтган музокаралардан сўнг ушбу режа сезиларли даражада ўзгартирилган, дея қайд этади Reuters.