“Реал”нинг 7 футболчиси Алонсо билан хайрлашмади

Испаниянинг Marca нашри синчковлик билан ҳисоб-китоб қилиб, Мадриднинг “Реал” клуби собиқ бош мураббийи Хаби Алонсо билан камида етти нафар футболчи хайрлашмаганини аниқлади.

Гап ижтимоий тармоқлардаги анъанавий хайрлашув постлари ҳақида кетмоқда.

Қуйидаги футболчилар бўлган воқеага ҳеч қандай муносабат билдиришмаган:

Винисиус Жуниор, Эдер Милитао, Трент Александр-Арнольд, Менди, Жуд Беллингем, Браим Диас ва Франко Мастантуоно.

Шу билан бирга, Килиан Мбаппе ва яна баъзи футболчилар нафақат муносабат билдиришган, балки мураббийга миннатдорлик изҳор этиб, унинг кетганидан афсусланаётганларини ҳам айтишган.

Marca таъкидлашича, ушбу “ажойиб еттилик” ичидан фақат Браим Диасни оқлаш мумкин. Чунки у ҳозир Марокаш терма жамоаси учун жуда муҳим бўлган Африка Миллатлари кубогида муваффақиятли иштирок этиш учун бор эътиборини мусобақага қаратган.