Расман. Муроджон Аҳмадалиев япониялик мутлақ жаҳон чемпионига қарши жанг олдидан Мексикада рингга чиқади

Ўзбекистонлик чарм қўлқоп устаси Муроджон Аҳмадалиев супер енгил вазн тоифасининг мутлақ чемпиони, япониялик Наоя Иноуэга қарши жанг олдидан Мексикада рингга чиқади. Бу ҳақда Matchroom маълум қилди.

Унга кўра, Аҳмадалиев 30 май куни Мексиканинг Гваделахара шаҳрида ўтказиладиган жанг оқшомида мезбон Луис Кастилога қарши рингга кўтарилади.

Аввалроқ Аҳмадалиев 14 сентябрь куни Токиода Наоя Иноуэ билан жанг қилиши расман тасдиқланган эди. Энди ўзбекистонлик спортчи ушбу супер баҳс олдидан тайёргарлик вазифасини ўтаб берувчи баҳсда иштирок этади.

Маълумот учун, Муроджон Аҳмадалиев шу кунгача профессионал боксда 14 та жанг ўтказиб, уларнинг 13 тасида ғалабага эришган (10 та нокаут) ва 1 та жангда имкониятни бой берган.

27 ёшли Луис Кастило эса 23 та жанг ўтказиб, 21 та баҳсда ғолиб бўлган (13 КО). У 1 та жангда дуранг қайд этган бўлса, яна битта жангда мағлубиятга учраган.