Рамзан Қодиров Алла Пугачёвани “халқ душмани” деб атади

Чеченистон раҳбари Рамзан Қодиров Алла Пугачёвани чечен халқи душмани деб атади. Бу гаплар хонанда томонидан Жоҳар Дудаев ҳақида айтилган ижобий фикрлардан кейин янгради. Қодиров Пугачёвани чеченларни “қарама-қарши қилмасликка” чақирди.

«Пугачёва каби халқ душманлари ва хиёнаткорлар чечен халқи учун энг оғир давр ҳақида аҳмоқона мулоҳазалар билдирмаслиги керак», — деди Қодиров ўз баёнотида.

10 сентябрь куни YouTube'да Алла Пугачёванинг уч соатлик интервьюси эълон қилинди. Унда у биринчи чечен уруши ҳақида ҳам гапирди:

«...Айниқса, биринчи чечен уруши хотирамда сақланиб қолган, чунки мен Жоҳар Дудаевни билардим. У жуда яхши, тарбияли, интеллигент, гўзал инсон эди», — деди Пугачёва.

Жоҳар Дудаев — 1990-йилларда Чечен сепаратистларининг етакчиси ва ўзини мустақил деб эълон қилган Ичкерия Республикасининг биринчи президенти бўлган. У 1996 йил апрелда Россия ҳарбийлари томонидан ўлдирилган.

Пугачёва 2022 йилда Россия—Украина уруши бошлангач, мамлакатни тарк этган эди. Унга Катерина Гордеева билан суҳбат — уруш бошланганидан бери биринчи катта интервью бўлди. YouTube’даги видеони беш кун ичида 17 миллиондан ортиқ киши кўрди.