"Қўмондонлик таркиби йиғилиши" бўлиб ўтди: Россия Сумига зарба берганини тасдиқлади

Россия Мудофаа вазирлиги 13 апрель куни Суми шаҳрига иккита "Искандер-М" ракетаси билан зарба берилганини тасдиқлади.

Россия ҳарбий идорасининг таъкидлашича, зарба Украина Қуролли кучлари қўмондонлик таркибининг йиғилиши ўтказилаётган жойга қаратилган. Натижада 60 дан ортиқ украиналик ҳарбий хизматчи ҳалок бўлгани хабар қилинмоқда.

Украина ҳукумати баёнотига кўра, Сумига берилган зарба оқибатида 34 киши, шу жумладан икки бола ҳалок бўлган. Камида 119 киши, уларнинг 15 нафари болалар жароҳатланган.

Кремль матбуот котиби Дмитрий Песков якшанба куни Россиянинг Украинанинг Суми шаҳрига ракета ҳужумини шарҳлаш сўровига жавобан, ҳарбийлар фақат ҳарбий ва ҳарбийга алоқадор нишонларгагина зарба бераётганини айтди."Мен фақатгина президентимиз ва ҳарбий вакилларимизнинг бир неча бор айтган гапларини такрорлаб, эслатиб ўтишим мумкин: бизнинг ҳарбийларимиз фақат ҳарбий ва ҳарбийга алоқадор нишонларгагина зарба беришмоқда," - дея Песковнинг сўзларини келтиради Интерфакс.