Ижтимоий тармоқларда Татаристоннинг Қозон шаҳрида ишлаш учун борган ғузорлик юртдошларимиз саккиз ойдан буён ойлик маошсиз мажбурий меҳнатга жалб қилингани ва яшаш жойисиз қолгани ҳақида видеомурожаатлар тарқалди.
Мазкур ҳолат мамлакатимизнинг Қозон шаҳридаги бош консулхонаси ва Ташқи меҳнат миграцияси агентлигининг Уфа шаҳридаги вакили томонидан назоратга олинган.
Ҳолат бўйича иш берувчи билан суҳбатлашилганда, мазкур фуқаролар ҳақиқатда Қозон шаҳридаги қурилиш обектида ишлагани, иш ҳақини тўлиқ олгани, фуқаролик паспортини олиб қўймагани, яшаш манзилига пул жўнатиб турганлиги, фақатгина охирги 11 кунлик иш ҳақи берилмаганини маълум қилди. Видеомурожаат қилган фуқаролар огоҳлантирмасдан иш жойини тарк этганлиги сабабли 11 кунлик иш ҳақини беришда муаммо пайдо бўлганини айтди.
Айни вақтда видеомурожаат йўллаган юртдошларимиз Ўзбекистонга қайтиб келмоқда.
