Қозоғистонда фавқулодда қўнган Ан-2 самолёти 8 соатдан кейин топилди

Қозоғистон жанубидаги Қизилўрда вилоятида Ан-2 самолёти фавқулодда қўнди.

Бу ҳақда мамлакат Фавқулодда вазиятлар вазирлиги матбуот хизматининг Телеграм-каналида маълум қилди.

Хабар қилинишича, қутқарувчилар уни саккиз соатдан кейин топиб олишган.

"Қизилўрда вилоятининг Тан-Қумкўл йўналиши бўйича ҳаракатланаётган Ан-2 самолёти фавқулодда қўнишни амалга оширди. Самолёт бортида 3 киши бўлган. Экипаж аъзолари билан алоқа бўлмаган, уларнинг қаерда эканлиги номаълум эди. 8 соат давом этган қидирув ишларидан сўнг, бедарак йўқолганлар ярим тунда чўлда топилди", — дейилади вазирлик хабарида.

Улар тиббий ёрдамга муҳтож эмаслиги қайд этилди.