Қозоғистон парламенти Мажлиси (қуйи палатаси) биринчи ўқишда қонунчиликда педофилия ва болаларни ўлдирганлик учун фақат умрбод қамоқ жазосини назарда тутувчи тузатишларни қабул қилди. Бу ҳақда парламент матбуот хизмати хабар берди.
Гап «Аёллар ҳуқуқлари ва болалар хавфсизлигини таъминлаш тўғрисида»ги қонун лойиҳаси ҳақида бормоқда. Унда, жумладан, вояга етмаган ёки ночор ҳолатда бўлган шахсни қийноққа солиш, соғлиғига оғир ва ўртача оғирликдаги зарар етказганлик учун қамоқ жазоси назарда тутилган. Ҳозир бундай жиноятлар учун эркинликни чеклаш ёки шартли жазо берилиши мумкин, янги қонунда ушбу бандлар чиқариб ташланади.
Бундан ташқари, вояга етмаган шахсни ўлдириш ёки педофилия учун умрбод озодликдан маҳрум қилиш тарзидаги муқобили бўлмаган жазо жорий этилади.
Шу билан бирга, саломатликка енгил зарар етказганлик учун, шунингдек, дўппослаганлик учун жиноий жавобгарлик тикланмоқда.
Ўз жонига қасд қилишга ундаганлик ёки ўз жонига қасд қилиш даражасига етказганлик учун 5 йилдан 9 йилгача озодликдан маҳрум қилиш жазоси белгиланади.
Шунингдек, ўз жонига қасд қилишни тарғиб этганлик учун жиноий жавобгарлик жорий этилмоқда. Вояга етмаган шахсга нисбатан буллинг ёки кибербуллинг учун ҳам маъмурий жарима қўлланади.
Қонун президент Қосим-Жўмарт Тўқаев топшириғига кўра ишлаб чиқилган, унинг муҳокамаси ўтган йилдан бери давом этаётган эди.